好玩夠型超級Mask

Xupermask

Xupermask 係Will.i.am 同精通個人防護設備及空氣淨化器嘅公司 Honeywell 合作開發嘅一種新型面罩。Xupermask 嘅功能都係以「型」為核心，所以佢除咗口罩嘅功能之外，仲加入LED 燈、降噪藍牙耳塞等技術，真係令小編眼界大開。

 

Xupermask採用HEPA濾網，同時可以自行更換濾網，口罩喺左右兩側有控制按鍵，包含風扇控制、降噪功能控制、Led燈號控制與聲音控制等等，佢嘅外觀係由口一直包到去耳仔，設計都非常有型，戴出街一定係眾人焦點。而口罩入面則採用矽膠材質，可以更貼合臉部輪廓，同時加強口鼻覆蓋位置，提升服貼同保護性。為咗俾用戶戴口罩時可以清晰咁利用手機講電話，XuperMask 整合咗支援主動降噪的藍牙 5.0 耳機和咪高峰，而佢嘅內置電池足夠為各項功能提供約7個鐘嘅使用時間。

 

Xupermask淨係睇個名已經覺得佢夠有型，Xupermask 讀音係"super mask"，仲要同潮人Will.i.am合作，如果戴口罩要戴得型過人嘅，呢款絕對係你要嘅嘢。

聞到清新仲有靚樣俾人見

Atmos

由AO Air公司出產嘅高科技口罩Atmos主要係加入過濾器同埋呼吸感應器，可以自動將佩戴者周圍嘅空氣過濾乾淨，然後再抽入口罩入面，等佩戴者可以吸到較為乾淨嘅空氣。呢款口罩比市面上一般口罩嘅過濾功能強好多，官方話高達50倍！因為佢哋有專有嘅 D'Fend 系統同埋自動過濾分子水平設計，可以保護你並且清潔超過 98% 嘅顆粒物，例如 PM2.5。

 

而小編覺得佢最吸引我嘅地方就係佢口罩設計係透明設計，睇落好高級好似去咗未來世界咁，而且可以俾人睇返我哋個靚樣，填補而家口罩做唔到嘅缺點，而且佢嘴巴同鼻周圍係冇密封，咁樣戴起上嚟應該都唔會唔舒服。

深化空氣連噪音都無埋

Razer Zephyr

Razer Zephyr又被稱做「行走的空氣淨化機」，佢最大嘅賣點係同時淨化空氣同噪音，連噪音都可以被淨化。呢款口罩兩側設有風扇幫助空氣循環，採用 N95 等級過濾材質，新冠等病毒絕對冇難度，公司都向註冊美國食品藥品監督管理局(FDA)註冊，經實驗室證明具備 99%細菌過濾率。

 

Razer Zephyr嘴部設計採用防霧透明面罩，可以俾人睇清楚佩戴者個口，搭配內建嘅麥克風及擴音器就可以放大使用者說話音量。而家市面上普通口罩成日遮住個口，有時講嘢人哋會聽唔清你講乜，呢個功能真係非常之貼心，幫你聲線降噪之餘仲可以睇到你嘴型，減低咗喺溝通上不必要嘅麻煩。有人講笑話呢款口罩好啱夜店嘅DJ用，因為夜店通常好黑，又嘈，呢款口罩仲有埋內部燈光，可以喺黑暗環境裡照亮表情，仲可以透過藍牙連線Razer Zephyr 手機應用程序調整 1,680 萬種色彩同一系列亮眼效果，設計出自己專屬嘅燈光秀。

尤如在森林中呼吸

LG Puricare

LG PuriCare 係一種可穿戴式空氣淨化器口罩，佢提供內置空氣淨化器、內置麥克風、擴音器同埋智能呼吸感應器，可以持續使用整整 8個鐘，呢個口罩無疑係一款超級舒適而且透氣嘅選擇。

 

好多人都話呢款口罩睇落好舒服，因為呢款口罩外型好乾淨利落，佢表面係一個光滑塑料，入面裝住雙逆變器風扇，而空氣就喺側邊引入，再通過 HEPA 過濾器和內部過濾器過濾空氣，最後污糟嘅空氣就會喺底部排出，網民都話戴咗之後好似喺樹林呼吸咁，好清新好順暢。

 

不過都有唔少負評指呢個口罩好重，戴咗上塊面就好似做緊肌肉負重運動咁，因為佢始終有一堆空氣淨化系統喺口罩入面，所以呢個都係佢缺點之一。雖然佢比較重，但係佢戴面之後係非常之緊，唔怕甩落嚟，不過會化妝嘅朋友就要留意，因為佢可能會有勒痕，唔知大家又點睇呢？

空氣清新機戴上頭

Dyson Zone

Dyson Zone係一款非常有趣嘅高科技口罩，因為佢係由兩個產品結合喺一齊，分別係頭戴式耳機同埋空氣清新機，空氣淨化機一向都係Dyson嘅招牌技術，所以產品一推出嘅時候，大家都非常期待。

 

Dyson Zone有兩個非常大嘅耳罩，呢個耳罩係一個好好嘅「袋子」，佢可以將電池隱藏喺入面，亦都附有種觸摸感應按鈕，等你可以方便咁控制 ANC 選項。呢個耳罩除咗有耳機功能之外，仲係一個好好嘅頭帶，聽講設計師喺設計Dyson Zone嘅時候，考慮到我哋平時戴口罩都係靠耳仔同埋面部去支撐口罩同埋佢嘅重量，當要喺口罩加高科技功能時，重量必然會增加，單靠耳仔同埋面部就會好辛苦，所以就出現咗呢款耳罩加口罩嘅設計。

 

至於口罩嘅部分，佢入面有一部非常之小型嘅空氣淨化機，呢個口罩離你塊面有幾厘米嘅距離，唔會完全掂到你塊面，所以你吸入嘅係通過兩個隱藏在耳罩中嘅電機嘅空氣。當然都有唔少人質疑佢嘅防菌功效，可唔可以當一般口罩嚟用，不過Dyson方面都有講話會推出相關配件。

 

Dyson Zone係一個非常之有創意嘅產品，佢嘅配戴方式係先戴咗耳機，再插入口罩，有邊個會諗到戴口罩嘅同時可以聽埋音樂，佢絕對係打破我哋對傳統口罩嘅概念。

口罩越來越有趣

不過都有好多人覺得呢啲口罩真係睇過就算，未必需要買，因為佢似一個裝飾品多啲，小編就覺得大家都係睇返自己嘅經濟同需求去選擇啦，條件許可嘅話買嚟玩吓都無妨，可能你會發現更多有趣嘅地方，創意永遠都係無價之寶。