咩嘢職業最易借錢買樓？

香港地上車難，儲到首期之後，都仲要計供款入息比率，通唔通過到壓力測試，睇埋銀行同按揭保險批唔批，先知係咪可以申請到按揭成功上車。

 

咁點樣先可以成功申請按揭呢？原來職業係其中一個重要因素，究竟咩職業係最容易申請按揭呢？咩職業又會比較難先獲批呢？

 

銀行審批按揭貸款，主要會考慮申請人三個重點：入息比率、職業穩定性同埋信貸紀錄。當然，薪高糧準嘅職業固然之較容易令銀行批出按揭啦，不過其他冇穩定收入人士亦並非無辦法。

 

一般固定受薪員工，會有稅單、糧單、強積金供款紀錄等作為入息證明，銀行會將呢類人士界定為有穩固收入，計算供款負擔時比較簡單。

 

較容易申請按揭職業：

 

1. 公務員
        例如：AO、EO、紀律部隊
        公務員嘅僱主係香港政府，雖然並非所有公務員人工都一定高薪，不過勝在出糧準時同穩定，若申請人信貸評級紀錄良好，要申請按揭完全無難度。
        
        

2. 專業人士
        例如：醫生、律師、測量師、會計師
        專業人士收入一般較穩定，而且需要持有專業牌照的行業，能突顯該職業的穩定性，因為考取專業牌照並不容易，可視為長久職業。
        
        

3. 穩定收入人士
        例如：教師、行政人員
        即使非專業人士，但如每月有穩定收入，能提供每月收入紀錄，而且信貸評級記錄良好，亦不難申請按揭。

 

而收入非固定，又或者入息證明不足嘅人士，銀行會將呢類人士界定為非穩固收入。佢哋未必有報稅及出糧、強積金供款紀錄，銀行審批佢哋嘅按揭申請時，所用嘅標準就會同有固定收入人士唔同。

 

較難申請按揭職業：

 

1. 自僱人士
        例如：手作店、補習老師、網店或網紅
        近年互聯網造就不少新類型商機，越嚟越多人自己做生意，但呢類人士通常會被當成非固定收入人士，審批會比較嚴格。如果想獲批八成按揭保險，最好申請商業登記證，保留最近一年利得稅單、經審核的財務報表同至少半年公司同個人嘅銀行紀錄。
        
        

2. 浮動薪金人士
        例如：保險經紀、地產經紀
        不少行業即使收入不俗，但若果薪金大部分以bonus 形式發放，並非每月固定的話，基本上亦未能做到九成按揭，而且銀行審批按揭申請的時間亦會較長。
        
        

3. 沒有收入紀錄人士
        例如：的士司機
        正如之前所講，有清晰穩定收入紀錄，可以增加銀行批核按揭機會。但好似的士司機呢類未必有收入紀錄嘅人士，銀行批核按揭嘅機會就比較細喇。所以此類人士如果想買樓，應定期將收入存入銀行，為自己製造長期收入証明。

 

無論收入幾高都好，想較易獲銀行批核按揭，記住要保持自己嘅信貸記錄良好，否則銀行都係會拒絕批核有關申請！