獨留主子在家驚悶親佢？AI玩具代替你陪寵物玩

1. 機械人主動搵寵物聊佢玩

如果你唔喺屋企，最理想就係件玩具，識得自己去搵寵物，然後撩佢玩啦，呢個叫「Enabot Ebo Air」機械人就完全做到呢個功能。佢內置AI臉孔識別以及逗寵模式，每日都會唔定時咁碌出充電器，然後行勻間屋去搵主子，搵到就會撩佢玩，例如用不同嘅行路方法或者速度(識得打圈、行八字或者急速地左右移動，好似跳舞咁樣)、同埋射出紅光，吸引主子注意然後追住紅光嚟玩。另外佢有不倒翁設計，無論主子點樣撥佢、推佢，佢都唔會兩輪朝天—反咗肚就唔識郁。遇到障礙物仲會識得避開，唔駛驚機械人會卡住響枱腳、或者入咗床下底出唔番黎。最後，小編認為最正係呢個功能: 就嚟冇電，機械人識自己行番去充電器叉電！換言之，你只要將機械人充一次電，校一次逗寵模式，咁機械人就會每日都同主子玩，唔駛日日set 機！

 

另外，小編睇YouTube見有人話買咗Enabot Ebo Air機械人，但貓貓唔追嚟玩，其實係主人唔識點同主子玩啫！如果貓貓唔追住機械人，好簡單，只要喺機械人身上纏住5、6吋長嘅魚絲，後邊綁住一個細細地嘅波(求其用廢紙搓成都得)，機械人快速咁郁或者原地轉圈，個波就會彈下彈下，貓貓見到一定會追住嚟咬啦！如果主子玩厭咗紙波，主人可以換條羽毛、或者綁兩三條長長哋唔同色嘅尼龍繩，貓貓見到都會撲過去抓住。

2. 掛牆式玩具等主子經過就射激光

如果你屋企唔係好大，某啲位係貓貓一定會經過嘅，例如放食物嘅地方、飲水器等，咁呢款「Bentopal – P08 LED智能激光玩具」就比較適合。將Bentopal – P08放嚮離地1至1.2米咁高，當佢感應到貓貓在附近行過，就會射出5分鐘激光然後自動關上，而光點係會不規則地移來移去，貓貓睇到就會撲嚟撲去。你可以設定激光快速或慢速，小編建議後者較好，因為激光郁得太快，貓貓未必跟得切，佢搵多幾搵、搵唔到就唔玩㗎喇。另外，唔好將Bentopal – P08放得太高，例如你將佢放響天光板，咁佢就好容易感應到貓貓在郁動，就會不斷放射激光，小編恐怕貓貓會玩得太攰。Bentopal – P08需要用USB充電3個鐘，然後運作3個鐘，如果開吓又停吓，都應該夠貓貓玩到你返屋企為止嘅。最後要注意唔好將Bentopal – P08放喺陽光直射嘅地方，咁就會襟用好多。

3. 自己識郁嘅波仲會避開障礙物

上述兩個AI玩具比較適合貓貓，跟住小編介紹狗狗都啱玩嘅玩具，首先係呢個叫「Wicked Ball」，一個識自己郁、識避開障礙物嘅波。有養過狗狗嘅主人都會知，佢哋對任何球狀物體都難以抗拒，咁點解唔用網球、壁球而要玩Wicked Ball？正如之前咁講，佢識自己郁，當主人開掣再選擇跳動模式，然後轉番實個殼，再放落地下拍一拍，佢就開始運作，例如彈下彈下或者四圍郁動去吸引狗狗注意，當狗狗掂到個波，佢就識碌去第二邊、或者跳吓跳吓，等狗狗撲上去捉去咬。10分鐘後Wicked Ball會自動停止唔郁，休息30分鐘然後又自動再郁過，如果半場休息時間狗狗再掂到個波，佢都會郁番陪狗狗再玩過。另外，當Wicked Ball撞到硬件例如梳化、牆、櫃或者門，會識得反彈，亦都可以碌過電線，咁主人就唔驚個波卡實咗，或者唔知碌咗去邊搵餐死。

 

雖然Wicked Ball有三種跳動模式，小編建議揀好動，因為其餘兩個模式，Wicked Ball郁動太輕微，未必引起狗狗興趣。此外個波體積比較大(直徑7.7cm)、外殼亦比較硬，狗狗可以擔住佢、可以將佢揈嚟揈去，不過廠商都唔建議俾大狗玩，因為驚佢哋會咬爛個波。小編最後一個小小建議，係主人要教識狗狗，個波係玩具而唔係怪物，然後先好單獨俾狗狗同個波玩。因為有主人拍片，狗狗見到Wicked Ball震上震落後就狂吠，嘈到鄰居就唔好啦。

4. 有自動模式或WIFI控制嘅骨頭狀玩具

 

跟住呢款玩具比較適合大狗玩，佢叫Wickedbone，其實同Wicked Ball來自同一間公司，只不過將球狀變咗骨頭狀，同埋支援WIFI，等主人可以透過手機控制骨頭移動。Wickedbone同Wicked Ball一樣，能夠根據毛孩嘅反應做出回饋動作，例如毛孩輕力拍佢，佢就前後移動，如果毛孩大力踩落去甚至咬佢，Wickedbone動作就會變得激烈，例如快速地上下跳動或者瘋狂打圈。另外主人可設定Wickedbone開啟時間，例如每5、10、15、20鐘郁一郁，等狗狗玩吓又休息吓。

 

Wickedbone嘅互動模式都適用於放狗時間。雖然Wickedbone支援WIFI，但有限範圍是20米內，所以放狗時執行互動模式，讓Wickedbone暫代主人替狗狗玩耍，就可以俾主人抖吓氣。喺室外，主人可以設定Wickedbone轉圈範圍更大、跳動得更激烈，然後就可以坐喺度，睇住狗狗同Wickedbone互相追嚟追去。廠商指Wickedbone用嘅物料係得到美國FDA認可，就算狗狗咬爛都唔會對健康有影響，另外佢比Wicked Ball更大型更硬淨，就算係人都要好大力先可以搣甩「骨頭」左右兩個碌，所以主人唔駛擔心，骨頭會俾狗狗咬甩個碌而唔識郁。而且Wickedbone係防水，出街玩完，只要開水喉沖洗骨頭就乾淨番。

5. 主人喺辦公室地點一樣可以逗狗玩

(大相: playdate)

 

主人返咗工，除咗搵自己識郁玩具幫手，亦可以自己操控玩具，遙距陪主子玩一陣。例如呢個「PlayDate」，可以經WIFI連接，主人用手機下載相關app，就可以返住工都陪到主子玩啦。首先PlayDate內置鏡頭，主人一直遙距操控，直至搵到主子，就可以開始玩樂時間。主人可以用手機，透過WIFI控制個波滾動方向，等主子撲嚟撲去，如果狗狗太跩，例如大力咬個波，主人可以透過咪高峰，大聲叫狗狗Stop！手機APP除咗控制PlayDate滾動外，仲識得即時影相，喺手機篤個鍵就影到相，為主人記錄下愛寵每一個攪笑嘅畫面。最後，PlayDate外殼材料係一層好厚嘅聚碳酸酯，一來防摔二來防水，可以好長時間都唔會被狗狗玩爛。

總結：以上呢幾件有AI功能嘅玩具，雖然可以暫時代替主人去陪寵物玩，但記住只限輔助角色，如果你想寵物同你親近啲，依然要親自陪佢玩，等貓貓狗狗聽從你嘅指令，你哋既互動先會更有趣味啊。