疫情關係，喜歡旅行嘅香港人都被困兩年多，今年似乎有解禁嘅機會，日本已率先開放俾香港人組團去玩。但都唔係個個都想去日本，而小朋友也想多看看世界，在旅行中學習。其實，近年都興起咗所謂嘅虛擬旅行團，每位收幾百蚊就有導遊帶大家去旅行，有觀光，有講解，有啲仲可以買埋手信，雖然全部都係喺網上玩，但勝在可以短時間內體驗到多個國家嘅風情。
不過，小編都係鍾意自由行，自己計劃行程，仲可以慳返團費嚟買美食外賣，同屋企嘅小朋友一齊來個虛擬遊世界。小編計劃的每一個站，都可以如置身其中，360度全景欣賞，有啲仲可以用VR眼鏡感受如在眼前嘅立體影象。
睇下大家又想唔想跟住小編嘅行程一齊去啦？
喜歡古代藝術嘅朋友，一生人至少要去一次敦煌石窟睇著名嘅壁畫，小朋友亦應該認識一下中國嘅歷史同文化。敦煌石窟係指公元4～14世紀在古敦煌郡地區開鑿的石窟。去過敦煌石窟嘅朋友都知道，為保護文物，好多著名石窟都唔係經常開放，我哋又唔可以近距離觀賞。不過我們只要透過網絡就可以參觀莫高窟（千佛洞）或榆林窟所有重要嘅洞窟，其中第249窟更唔可以錯過，因為可以用最近嘅距離欣賞著名嘅「敦煌飛天」。
呢次敦煌虛擬遊，好似睇我哋”House 730”嘅VR樓盤咁，以360度全景參觀，仲可以用VR眼鏡感受下如親歷其境嘅立體影象。（文末亦會教大家自製VR眼鏡呢）
Click入去「敦煌石窟」旅行吧：
遊完敦煌，欣賞過佛教嘅高度藝術成就，不如帶住小朋友繼續尋找佛教歷史之旅，飛去緬甸嘅古王國，蒲甘。
蒲甘係蒲甘王朝首都，又被稱為緬甸心臟，喺公元9世紀到13世紀，我哋可以由歷史遺跡中見到佢曾經嘅繁榮景象，而呢度嘅日出日落特別美麗。蒲甘有過萬間有上千年歷史嘅佛教寺，今次，我地喺虛擬嘅世界請嚟一次資深嘅導遊，等我地可以一邊喺虛擬嘅空間遊覽，一邊聽歷史同文化嘅講解，小朋友更加可以趁機學英文添。
同導遊一齊Click入去遊「緬甸蒲甘」：
https://artsexperiments.withgoogle.com/bagan/
無論你去幾多次歐洲，都總有一次專誠去巴黎羅浮宮朝拜藝術，如果想小朋友接觸最有價值嘅藝術收藏，都必定要帶佢哋嚟。
羅浮宮可以講係世界最知名嘅博物館，佢原本係皇宮，收藏咗有近40萬件藝術品，包括雕塑、繪畫、美術工藝以及古代東方、古埃及、古希臘同古羅馬等。而著名嘅「蒙娜麗莎」原畫就係必看作品。
喺羅浮宮虛擬遊，可以隨便觸摸同微距睇作品嘅細節，唔怕整壞文物。不過，睇完虛擬品，日後都一定要帶小朋友睇實體版呀。
Click入「法國巴黎羅浮宮」盡睇最有價值名作：
https://www.louvre.fr/en/online-tours#virtual-tours
第四站：電影迷朝聖地：英國倫敦老皇家海軍學院
去英國倫敦唔一定要去睇大笨鐘，小編係一個電影迷，我更想帶小朋友去英國倫敦老皇家海軍學院，因為呢座係英國其中一個最壯觀嘅建築，曾出現喺《四個婚禮和一個葬禮》、《天降殺機》、《雷神：黑暗世界》等多部電影中，可以一邊用360度全景去參觀裡面嘅古典壁畫，一邊同小朋友講下電影，係好唔同嘅合家歡時間，而且跟旅行團都未必安排到去睇呢座老皇家海軍學院。唔單止咁，學院其實同中國都有淵源，喺晚清時期培養過一啲中國來嘅資深軍官同技術人員。
Click入去「英國倫敦老皇家海軍學院」來次電影之旅啦：
（photo: casa001-002）
建築師安東尼·高迪可以話係建築歷史嘅怪人兼奇材，佢所設計嘅作品都好似歪曲變形，似童話世界又似未來出現嘅建築，好多人去西班牙玩嘅其中主要原因，就係去訪尋高迪嘅建築作品。
其中嘅代表作，當然係巴塞隆拿市中心嘅巴特羅之家。如果想你嘅小朋友認識多啲建築美學，俾佢哋去睇高迪嘅作品就最好嘞，因為佢設計得好似得意玩具咁，小朋友一定鍾意呢種古靈精怪嘅嘢。
巴特羅之家可以話係高迪設計中獨具一格且不可複製嘅建築藝術特色，以及原汁原味嘅現代主義美術與工藝精品。
Click入「巴特羅之家」，同小朋友一齊進入古怪嘅建築：
https://www.casabatllo.es/en/virtual-tour/
離開歐洲，一家人飛去美國，想小朋友接觸香港睇不到嘅美景，而小編又是攝影發燒友，就揀咗去加洲中東部嘅優勝美地國家公園（Yosemite National Park）。
呢個地方已被選定為世界自然遺產，花崗岩峭壁同瀑布都非常壯觀，而清澈嘅溪流、巨型紅杉林同生物多樣性係行山友最愛嘅景點，優勝美地國家公園每年可以吸引四百萬遊客來嘅其中一個原因，就係經典純黑白攝影大師Ansel Adams為呢個公園影下多幅傳世嘅黑白作品，絕對係攝影發燒友夢想去朝聖嘅地方。
帶住專業相機Click入去學大師影靚景：
https://www.virtualyosemite.org/virtual-tour/#node67
如果帶住小朋友去旅行，其中一個行程必然係要去睇動物，所以小編都安排咗去全球其中一個規模最大嘅動物園，聖迭戈動物園（San Diego Zoo），佢位於美國加州，裡面棲息住800幾種、超過4000隻動物。而今次嘅網上旅行同其他有啲唔同，佢提供嘅係多個唔同種類動物嘅Live Cam ，等我哋透過攝影機觀察各種動物嘅生活，就好以去到現場睇一樣，小朋友一定睇得好興奮。
Click入去「聖迭戈動物園」睇下可愛動物嘅生活直播
https://sdzwildlifeexplorers.org/videos
香港人係好難得去中美洲旅行，今次小編特別安排咗一站去睇美洲最大、最古老嘅主教座堂，就係位於墨西哥城市中心嘅天主教墨西哥城總教區嘅主教座堂。佢喺1813年完成，用咗西班牙巴洛克風格建築，有兩座鐘樓、16座小堂，各有華麗祭壇、繪畫同雕塑，其中仲擁有兩台18世紀巨大管風琴，肯定好多人都未見過，絕對大開眼界。
Click去「墨西哥城主教座堂」感受最古老美洲教堂嘅神聖：
https://www.cyark.org/projects/mexico-city-metropolitan-cathedral/3D-Explorer
香港小朋友應該對南美洲嗰歷史所知甚少，但如果同佢哋講，我哋返香港之前去看一看「天空之城」，佢哋一定歡呼興奮。不過，小編唔係帶佢哋去睇宮崎駿，而係去
秘魯嘅馬丘比丘（Machu Picchu）。呢個山城位於海拔2,430公尺山脊上，望住成個烏魯班巴河谷美景，好似處身喺天空之城般，亦係世界各地行山友一生人最想去行嘅其中一個地方。
一邊同小朋友用Mouse行馬丘比丘，一邊可以同佢講下美洲嘅歷史，講下馬丘比丘係印加帝國嘅古城，而印加帝國又曾經係南美最大帝國，好多卡通片都有用呢個時期做背景，而點解要喺高山起呢座古城原來都係一個謎，一於叫小朋友運用想象力去估下啦。
Click入去探索神秘嘅天空之城馬丘比丘：
作為香港人，要環遊世界都一定唔會漏咗去日本嘅，好多小朋友都好鍾意車，所以，小編喺最後一個站就安排咗去日本廣島睇萬事得博物館。萬事得作為日本最古老嘅車廠之一，有上百年嘅歷史，佢嘅車一直影響住汽車發展，所以車迷去睇萬事得啱啱重修嘅博物館，必然滿載而歸。
我們可以自由自在咁睇到十個主題展區，無論經典作、童年回憶、萬事得賽車傳奇，其至係車廠未來設計，都一一盡覽，行足一日都得啊。
車迷們一齊飛去廣島睇萬事得博物館啦：
https://www2.mazda.com/ja/onlinemazdamuseum/
同小朋友一齊自製VR眼鏡
喺今次嘅環遊世界旅程，有幾個站都可以用VR眼鏡去感受近在眼前嘅立體影象，咁就可以趁住特別嘅親子時間，一齊跟住政府康文署喺YouTube教我哋點樣自製VR眼鏡，Let’s Go，一齊DIY啦。
https://www.youtube.com/watch?v=0dj6yIk9ylg
VR Tech實你 虛擬導覽 旅遊 博物館
