七大無聊智能發明 可磅重嘅滑鼠有咩人啱用？

1. 智能雞蛋架

 

智能雞蛋架嘅主要功能係話畀用家知雪櫃仲有幾多隻雞蛋，提醒你使唔使入定貨。只需連上手機程式，就可以用手機實時查看。不過，如果係一個專業嘅家庭主婦，又點會唔知屋企剩低幾多隻雞蛋呢？

2. 可磅重滑鼠

 

滑鼠可插記憶卡或有計算機功能都聽過，但係呢款有加設秤重功能嘅滑鼠真係令小編大開眼界，乜真係會有人拎隻滑鼠去磅重？定係每日攞嚟磅下隻手有幾重，睇睇健康情況？除咗藥劑師，大家又諗唔諗到有咩人啱用？

3. 天氣預報智慧雨傘

 

落雨出街最怕大頭蝦漏低把遮喺商場或餐廳唔記得攞，甚至留低響邊都唔記得，呢把智慧雨傘外形獨特之餘，更內置定位功能，只要你離開手機超過 10 米，手機就會即時發出聲響通知用家，仲可以利用手機 App 追蹤把遮嘅位置，咁就唔驚搵唔返把遮啦！就算唔見咗手機，用家都可以搖一搖把遮，手機就會發出聲響提示佢嘅位置。聽落都好實用啊，咁究竟佢無聊喺邊？

 

原來呢吧遮仲有天氣預報提示，等你知道今日要唔要帶遮出街。其實每日開天文台個APP都已經睇到天氣預報啦，仲洗乜佢再提示，佢都係乖乖地做把有定位功能嘅遮算啦！

4. 提醒飲水智能水壺

 

飲水對身體有益就個個都知架啦，不過就唔係個個每日都會飲到足夠嘅水，呢款智能水壺就專門發明嚟督促人飲水。如果你兩個鐘冇掂過智能水壺，壺蓋就會閃爍燈光，催你飲水。

 

人口渴就自然會飲水架啦，係唔想飲催都無用，不過會閃燈呢個功能或者可以當電筒用嘅……

5. 自動增值記憶豬仔錢罌 

 

小朋友細細個學識儲錢好重要，所以我地細個嗰陣幾乎每人都有一個豬仔錢罌用嚟儲錢。宜家啲豬仔錢罌都升lv，加咗自動增值記憶功能，識得自動識別同計算硬幣數值 (港幣專用)，仲可以顯示硬幣總數值，真係連數錢嘅功夫都慳返！算係無聊得來又幾實際嘅發明之一啦。

6. 記錄腰圍尺寸皮帶扣

 

智慧皮帶外型同一般正式皮帶差唔多，但內建感應器，除咗記錄基本日常步數之外，仲會追蹤同記錄你坐喺度嘅總時間，以及腰圍尺寸，提醒你係時候要企起身或者行一圈，雖然聽落實用，但功能同智能手環或者手錶好類同，感覺有啲多餘。

7. 寵物頸圈攝影機

 

一般人可能覺得好無聊，但對於愛寵之人，呢款專門針對寵物設計嘅攝影機絕對實用！將佢扣喺寵物項圈上固定住，就可以令你從寵物嘅角度望世界，體驗佢嘅冒險故事，並捕捉珍貴片段，當你外出嗰陣，仲可以知道佢有冇搞搞震！

總結 7 大無聊發明比較： (5★為高)

	創意度	實用度	無聊度
智能雞蛋架	★	★	★★★★★
加設秤重功能的滑鼠	★★★★	★	★★★★★
天氣預報智慧雨傘	★★★	★★★★	★★★
提醒飲水智能水瓶	★★	★★★	★★
自動增值記憶豬仔錢罌	★★	★★★★★	★
記錄腰圍尺寸皮帶扣	★★★	★★★	★★★
寵物頸圈攝影機	★★★★	★★★★★	★★