執屋可以吸引異性？吸引力法則助你早日「脫單」

喺介紹真人騷之前，等小編講下咩係「吸引力法則」啦！

 

「吸引力法則」（The Law of Attraction）係新思維運動嘅一種概念，指人與人之間嘅關係可以透過正面或負面思維，從而增加正面或負面結果嘅機會。「吸引力法則」亦泛指，具有類似思維、氣質嘅人，係會互相吸引，所以唔係單純一個思維對另一個思維嘅影響。我地可以簡單理解為：兩個有類似思維同心態嘅人，係會彼此吸引。

 

1）日常用品成雙成對

呢個真人騷名叫《GO！執！事務所》，製作組第一集就率先到訪其中一位主持DJ黃正宜（阿正）屋企執屋，另一位主持「執事」JanJan，就根據「吸引力法則」，教阿正點樣妥善擺放屋企物品，從而令自己容易吸引異性，最簡單嘅方法就係將日常用品都要「成雙成對」。例如阿正雖然單身，但睡床都需要放兩個同色枕頭（異色枕頭會有同床異夢含意）；又例如，洗手間要有一對牙擦、漱口杯等（千祈唔好營造一個謝絕探訪嘅壞氣氛）。

《GO！執！事務所》

另外，如果屋企要擺花，最好用真花，唔好用乾花或假花，因為後兩者都係有「假」嘅象徵意義，唔係「真」，就好似唔會有人想有假嘅愛情一樣。最後JanJan語重心長同阿正講：女仔房係唔可以亂㗎！雖然JanJan冇詳細解釋，但小編估計，假如有心儀對象到訪自己屋企，見到間屋好似垃圾崗咁，即刻扣晒分啦！

1）碎花紋床被、花紋牆紙

其實唔止香港節目有提及教人點樣「脫單」，韓國Youtuber徐恩熙，亦喺自己頻道分享睡房點樣擺設，提升個人魅力吸引異性。

 

首先，單身嘅人，要換一張顏色艷麗嘅碎花紋床被，例如粉紅色、紅色。第二，喺床頭或床邊放一盆花，無論係鮮花或者花形嘅擺設都可以，但記得要放雙數。第三，睡房換上有花紋嘅牆紙，紅色就最好，如果覺得太古怪，可以揀淺紅色碎花紋嘅牆紙。

 

韓國Youtuber徐恩熙

或者有人可能會唔信所謂嘅吸引力法則，但小編覺得以上方法都幾簡單，想脫單嘅人試下都無妨。不過除咗呢兩種方法，改善個人嘅生活習慣都好重要，一個人瞓得好、心境開朗，睇起嚟精神奕奕，比起經常垂頭喪氣、睡眼惺忪嘅人，一定更容易吸引到異性！