至潮消費券攻略 5,000蚊買到全新蘋果手機有突？

1. 認識第二期消費券領取方法

 

介紹產品前，等小編先同大家講解吓第二期消費券領取方法啦！

政府第二次向合資格市民派消費券，今次金額增多一倍至$10,000，同樣係兩期發放，亦都係透過電子支付工具使用。第一期係4月7號，第二期預計係年中。一般嚟講，上一次已成功登記並拎到消費券嘅市民，唔使再登記 (除非你上次用八達通收消費券，但又唔見咗張八達通)。第一期消費券會派番去你舊年用嚟收消費券果個電子支付戶口，例如你舊年用八達通，今年第一期都係用返果張八達通，而第二期派消費券，政府就容許市民更換其他電子支付方法，到時睇吓邊間多著數再考慮改用邊間啦！

 

如果你上次用支付寶香港、Tap & Go「拍住賞」或WeChat Pay HK帳戶收消費券，第一期係收到$5,000，有效期至今年10月31日。但如果上一次係用八達通收消費券，今次就比較複雜。首先，第一期消費券發放後，你仍舊要去啪卡領取。

 

咁八達通限額問題點處理？由於八達通卡嘅儲值限額為$3,000，你可以先用完$3,000，再領取$1,000，剩低嘅$1,000最早將會係6月16號開始發放，但要係之前個月洗晒八達通入面果$4,000消費券，先可以下一個月16日拍卡領取，而最遲發放日係11月16日，換言之你10月31日前一定要用曬$4,000。

 

有關八達通消費券嘅資料，大家可以參考：

https://voucher.octopus.com.hk/tc/overview/index.html

2. $5,000以下至潮又實用家電推介

 

$5,000話多唔多，但都有好多款唔同家電產品可以選擇。蘋果上月中推出全新iPhone SE，最平$3,699就買到，呢排都好多網民講緊值唔值得買，等小編分析一下啦。另外三樣小編推介嘅家電，分別係無線吸塵機 Dyson V11 Absolute Extra、粉囊咖啡機 Nespresso F531 Gran Lattissima以及蒸氣烤焗水波爐 Toshiba ER-ND300HK，主要係針對番而家防疫、居家抗疫嘅環境，等你同屋企人住得舒服又安心。

  

蘋果全新iPhone SE

 

官方名稱係全新iPhone SE，但小編為咗大家方便睇，下文就以SE3嚟稱呼呢部手機，2020推出果個就叫SE2啦。首先SE3比起SE2有5項改進：微調顏色睇起上嚟更時尚、處理器換上最勁嘅A15、連帶影相效果同續航時間都有大幅提升、最後係支援5G。

 

驟眼睇，SE3同上一代都係黑白紅三色，但如果拎兩部機面對面比較，就會發現SE3的「黑」「白」色係同SE2有少少唔同：前者在日光下會呈現深藍色，後者喺室內環境，會睇到背殼帶少少金，所以SE3雖然沿用上一代外型，但少少顏色改變就令佢多咗時尚氣息。而SE3最大賣點係採用A15 Bionic晶片，令SE3影相靚咗、粒電襟用咗，同埋打機更加順暢。SE3保留咗上一代嘅1200 萬畫素廣角鏡頭，同埋 5倍數位變焦、光學影像穩定功能、人像模式以及最高支援 4k 錄影等功能，並新深度融合、攝影風格自訂同埋智慧型HDR4等，得益於A15 Bionic晶片嘅強大運算能力，當用戶撳咗快門後，瞬間完成顏色、對比、光陰等處理，打卡真係好方便。不過SE3冇夜間拍攝模式，光學防震唔係感應器移動式，亦都冇兩倍光學變焦，所以夜景及遙距係佢既弱點。此外，SE3續航時間比起上一代有可觀嘅改進，蘋果官網話SE3喺串流睇片同埋播歌時間，長達10以及50小時，分別較SE2多兩個鐘同埋10個鐘。

 

小編覺得，如果作為一部入門或者後備手機，又或者你對細機、Touch ID特別偏愛，SE3嘅性價比係唔差嘅。正如蘋果CEO Tim Cook喺發佈會所講，SE3目標客戶係鍾意細機、未用過iPhone嘅人、同埋及預算較低嘅用戶。首先鍾意細機，其實都唔多選擇，一係iPhone嘅mini系列，一係SE3，但後者平差唔多二千蚊，都唔駛點考慮吧？至於用開Android但想試吓iOS好唔好用，SE3有Home鍵，方便一撳去返主頁，同Android一樣咁簡單，如果用唔慣，咪當用嚟做後備手機囉，畢竟佢夠細部，放入袋都唔阻你好多位。最後，最後，家長想送部手機俾子女，SE3真係不二之選，除咗可以滿足到佢地成為「小果迷」之餘，最重要係唔會令佢地成日玩手機，因為個芒太細，長時間睇住其實好辛苦。不過，如果你習慣咗大芒手機、鐘意影專業級數嘅相片影片、經常手機不離手、愛打機嘅用戶，SE3可能就唔太適合你。

 

(建議售價：$3,699 (64GB) / $4,149 (128GB) / $4,999 (256GB))

無線吸塵機 Dyson V11 Absolute Extra

 

呢兩年嘅疫情，令大家都特別注重家居清潔，一部「乜都吸到」嘅吸塵機可以令你家居更加乾淨，絕對值得投資啊。 Dyson V11 Absolute Extra有三種吸力模式，專為唔同嘅清潔任務而設，例如地氈吸塵、地板上邊較大件嘅垃圾（好似餅乾碎）、或者牆角天花頂嘅灰塵等，佢仲會根據清潔任務需要，提供相應嘅電力及使用時間。整合數碼摩打每秒可旋轉刷條60次，硬尼龍刷毛可深入地毯，清除頑強污垢，防靜電碳纖維可捕捉硬地板中嘅微塵。打掃途中，以智能顯示即時報告，每秒監測系統表現8,000次，而且喺LCD屏幕上實時報告。打掃後，「一鍵清空」嘅設計，令用戶可以好衛生咁將深入集塵筒嘅灰塵及碎屑排出，雙手無需接觸污垢。使用後，將機身存放喺掛牆式充電座，可以充電之餘更整齊咁存放好，方便隨時使用。

 

(建議售價：$4,799)

粉囊咖啡機 Nespresso F531 Gran Lattissima

 

確診人數雖然開始稍微回落，不過唔少公司仍要求員工WFH，加上部分咖啡店都暫停營業，令起身就要飲咖啡提神嘅咖啡控，每朝起床後都好難提起精神工作，呢個時候， Nespresso F531 Gran Lattissima粉囊咖啡機就可以幫你醒一醒神。佢內置6款鮮奶咖啡食譜，令你即使安坐家中，都可以享受到咖啡店級嘅滋味咖啡。有咗佢，咖啡店嘅滋味，撳一個掣就呈現眼前，無論您想品嚐 Cappuccino、Latte、Flat White，甚或只是想為咖啡加啲奶泡，佢都為你輕鬆實現每個香濃願望，完美帶出每款咖啡的獨有芳馥！操作簡單容易，而且兼備25秒快速加熱功能，內置19巴高壓提取系統，能夠確保你嘅優質濃縮咖啡體驗芳醇如一。

 

另外，Nespresso F531 Gran Lattissim組件都易於清洗，喺每次使用後，以人手清洗快速Cappuccino 系統。方法就係拆開快速Cappuccino 系統，以暖滾水（40° C／104°F）小心清洗奶漬，再用海棉擦去污漬。最後用暖滾水混合溫和／輕柔清潔劑，浸泡所有組件最少30分鐘，之後再用暖滾水徹底沖洗就可以。

 

(建議售價：$3,788)

蒸氣烤焗水波爐 Toshiba ER-ND300HK

 

經過兩年幾留喺屋企煮飯仔日子，相信你哋既廚藝已經再唔係「吳下阿蒙」喇，氣炸鍋呢啲入門嘢又點可能滿足你呢？一於決心「升呢」，買返部蒸氣烤焗水波爐啦。呢部Toshiba ER-ND300HK蒸氣烤焗水波爐，具備蒸、焗、燉、烤及烘焙等功能之餘，更內置多達51種自動烹調模式，跟食譜準備食材，撳一吓掣就可煮出各種唔同菜式，無論烤、炸、煮、蒸、炆、燉甚至整麵包做早餐都難唔到佢。等小編簡單講吓乜係蒸氣烤焗水波爐，佢可以將過熱水蒸氣的熱能轉移到食物內部，由內而外加熱，可以逼出食物多餘嘅油脂同鹽分，減少對食物細胞嘅破壞同氧化，達至脫油、減鹽同保留食物營養素嘅功用，兩種交互運用可以令食物快速完成，呢個就解釋到點解蒸氣烤焗水波爐喺日本咁受歡迎嘅原因。

最後，就連整甜品都難唔到呢部蒸氣烤焗水波爐。將6-8人份冰花燉蛋放入爐，全程無需「睇火」，蒸煮模式提供穩定攝氏100度蒸氣蒸煮，幫助鎖住食材的鮮味之外，更可以提升燉蛋的嫩滑度，幾分鐘就食到架喇。

(建議售價：$4,998)

總結：

 

四件產品都咁正，但第一期消費券只有$5,000，如果俾小編只揀一樣，我嘅心水係Toshiba蒸氣烤焗水波爐。雖然佢表面價錢好貴，但佢集氣炸鍋＋焗爐＋鐵鍋＋煲於一身，而且又慳到煤氣費，小數怕長計，咁精打細算最終一定慳到錢。另外煎、炒、蒸、焗、煮、炸都係撳個掣就搞掂，哪怕你WFH掛住工作，依然可以煮返幾味慢慢嘆！