【湯文亮專欄】識買樓才會要買摸貨

有老友問，怎樣才算是頂級投資者，筆者認為是懂得買摸貨的人，老友以為我講錯，應該是賣摸貨的人。其實，要賣摸貨是很容易，買十幾個單位或者車位返嚟，要賣走三兩個是很容易，但剩下的是很難賣走。

情況好似去買橙，小販用100元買入十個橙，而有人可以用11元一個任揀，表面上是小販每個賺了一元，但被人揀完揀剩，只剩下一大堆籮底橙，一元一個都未必有人買。所以，能夠以合理價錢，買到優質摸貨，雖然賣家是賺錢，但買到摸貨的人仍然是贏家。

有人問我，投資物業有咁長時間，最失威是那一次，蝕了幾次錢。我最失威的一次，是買入一整層高樓層商廈，賺了10幾個百分點就賣走，賣走之後就呻笨，咁靚物業冇可能賣走。

以後，我冇機會買入類似樓層，即使願意出高價都買唔到，那次雖然表面上賺到少少錢，但其實是輸了很多，因為那層商廈有巨額升幅，我唔知人點睇，但自己認為是失威失到盡。

有一些人可能時來運到，突然間可以買到一些優質物業，但又唔夠膽揸，最後要將物業摸走，表面上賺了一些easy money，其實是錯失了一生不可多得良機，碰上這些機會，千祈唔好手軟，唔好怕俾錢人賺，因為結果是那人賺得少，接手的買家賺得多，如果唔願意接摸貨，最後損失最大的，反而是不願意接摸貨的人。

作者為紀惠集團行政總裁湯文亮