業主點解希望租客早日執笠
有老友話，最近去一些食肆食飯，甚至是米子連食肆，不但招呼唔好，出品亦很差，唔明白他們可以捱得過疫情，現在點解唔做好啲，咁樣做落去，很快受到執笠關注組關注。
我話受到執笠組關注都冇意思，關注組只會關注有幾多舖頭執笠，然後話香港玩完了，現在發覺不少舖頭在執笠之後好快就重開，於是改口話一雞死一雞鳴，至於點解雞死雞鳴，關注組一於少理。
業界很多人都知道，這是政府的德政做成，所以，不少收租佬反而希望租客早日執笠，等他們可以將舖位早日再租出去，不但租金有機會比疫情前更高，雖然機會微啲，但唔使擔心新租客唔交租，如果舊租客仍然繼續租，就算唔收租他們都做唔掂，因為現在執笠的食肆，大多數欠銀行一筆由政府擔保的債務，由於數目太大，食肆點做都還唔到，最好辦法就是執笠，之後由親戚朋友用其他名字重新在另一舖位開業，至於欠政府的債務，估計最後都是不了了之，所以，早一日執笠即是將事情做一日解決，對業主來說反而是一件好事，以後可以正常收租，唔使俾租客話無良，賺埋都唔夠交租。
有老友不明白，既然欠債不用還，點解那些執笠舖頭老闆要遠走家鄉，其實，他們唔走唔得，不少欠政府擔保貸款的老闆，同樣欠一大筆簽了私人擔保的租金，欠政府的可以不還，欠業主的租金一定要清還，而且數目不菲，隨時是半年租金，所以，那些老闆寧願遠走他鄉，然後站在道德高地對外界說香港玩完了，其實，真正玩完的是他們。
| 各區最新放盤應有盡有 |
