獨家代理變獨家害你
有老友不明白，我們公司的買賣租務，都是由同事聯絡不同物業代理，點解唔乾手淨腳交俾一間代理行做獨家代理，由他們統籌，一定會比我們自己做得好，老友不明白什麼是力不到不為財，代理行最努力就是取得獨家代理，基本上上已經完成任務大半，以後由自己做就收足，由其他代理行做就收一半，正是公死有肉食，婆死有肉食，現在已經唔多見業主委托代理行做獨家代理。
其實我們亦試過委托代理行做獨家代理，但代理行做獨家之外，不但有興趣的買家少了，甚至連睇樓的人都少了，代理行不但唔心急，並且鼓勵我們搵其他代理行一起做，最後，我們可能要付雙倍佣金才能做成交易，獨家代理變成獨家害你。
如果李總理識得我，我就會勸佢唔好用1800萬美元獨家贊助Taylor Swift 東南亞演唱會，因為會得罪其他週邊國家，包括馬來西亞，泰國，印尼等，不用擔心香港，香港政府冇咁大膽贊助1800萬美元，首先泰國總理唔開心，爆料新加坡獨家贊助，結果是東南亞國家杯葛Taylor Swift 演唱會，搞到李總理要親自向傳媒解釋，有人話不是解釋，是道歉。
新加坡如意算盤，就是取得Taylor Swift 東南亞演唱會獨家代理之後，所有東南亞國家權貴如果要睇，就一定要去新加坡，從宜得到5億美元經濟效益，但結果很少知名人士去新加坡睇Taylor Swift ，只有什麼柔佛二王子，周受資等去睇，而周受資是新加坡人，支持政府是很正常，我唔敢講是否有5億美元經濟效益，但我夠膽講新加坡以後唔敢再搞獨家代理，因為知道獨家代理最後會變成獨家害你。
| 各區最新放盤應有盡有 |
