十大最無聊產品（排名分咗先後）

 

第十位：咬手指電子貓

圖中嘅電子貓係嚟自日本嘅Amagami Ham Ham，佢嘅主要功能係透過咬你手指令你開心。佢有好多咬嘅唔同節奏，令你喺被咬時產生更多樂趣。

 

咬咬貓嘅創作者及Yukai Engineering CEO Shunsuke Aoki話，俾到人有開心時刻就係Amagami Ham Ham嘅創作目的。

 

小編點評: 養貓人大多俾貓咬過，有時會出血，有時只係輕輕咬吓，貓奴從而知道主子想點，奴才先可以盡心侍奉，主子舒服，奴才就開心，呢點先係貓奴養貓嘅最大樂趣，而唔係被咬嘅觸感吧。

第九位：書枱上之拳擊

都市人工作壓力大，有時上司、同事俾好多屎你嘅時候，壓力、委屈源源不絕，呢個書枱上之拳擊就可以幫你擊走哂佢地!

 

小編點評: 手指拳擊，汗都唔出，真係減到壓咩? 

第八位：寵物拍拍器

有時寵物係咁討拍、討摸，確實太纏人，有發明家就發明左呢個寵物拍拍器，幫你拍寵物，仲話”never touch your pets again” 添。

 

小編點評：咁驚摸寵物，咁你點解要養呢?

 

第七位：加水純棉底褲

Amazon 有人問關於呢個產品係咪實用架? 真係有條底褲? 答案係：NO ! 只係新奇玩意，加水之後展開棉團，就會有條濕濕底褲，要等佢乾返先著得。

 

小編點評: 咁.... 如果唔係加水，加其他顏色液體咪有彩色底褲?! 

第六位：大便計時漏斗

好多人去廁所都會帶埋電話/書入去，睇到入哂神都唔知原來已經坐咗喺馬桶好耐，為免大家生痔瘡，有發明家就發明左大便計時漏斗，俾你5分鐘時間上大，大家覺得有用嗎? 會唔會呢個其實係十大最想擁有產品呢?

 

小編點評: 計住時開大，好大壓力喎!

 

第五位：充氣揮手仔

東南亞好流行呢種充氣揮手仔，好多餐廳、洗車地方門口都有佢嘅身影，見到佢不停咁向你招手，都俾佢嘅熱情帶動，會心微笑。而家有迷你版，可以放枱頭櫃頂，日日都有人同你熱切揮手，做野都好有動力啦！

 

小編點評：可能加埋殺老師個樣會仲有趣！

 

第四位：扮擠暗瘡神器

好多人覺得擠暗瘡好治療，網上更有好多影片係影住人擠暗瘡，有發明家就睇準商機，將擠暗瘡化作硬膠產品，擠出扮係暗瘡嘅軟膠。

 

小編點評：毛孔粗大，小編係女仔睇得好唔舒服，好想買收細毛孔產品添!

 

 

第三位：寵物掛勾

睇嚟寵物真係好多人嘅煩惱或創作之源，當你想寵物乖乖地唔好搞破壞，可以點做？ 掛住佢咪乾手淨腳囉! 

 

小編點評：咁多個大窿，真係掛得住咩......

 

 

第二位：午睡枕頭

據講呢個午睡枕頭可以阻擋光線同埋噪音，而且佢嘅物料好透氣，唔會影響呼吸添。

 

小編點評：呢個外型....喺公司用即使阻擋到光線同噪音，但阻唔到同事走埋嚟物理攻擊吧！

 

第一位：寵物石

有無諗過養寵物? 唔想餵、唔想同佢散步? 養石就啱哂你喇! 據講創作者係喺酒吧聽朋友呷養寵物好麻煩而萌生呢個寵物石嘅念頭，大家點睇呢?

 

小編點評：無聊產品第一位，實至名歸，聖誕節想送玩人禮物就啱哂！

【上車盤推介】立即搜尋最新上車盤

十大最想擁有科技產品

 

第十位：智能震動滾筒 (Therabody Wave Roller)

舒緩身體痛症嘅產品越嚟越盛行，呢個以滾動、震動同埋振頻原理，令到身體嘅痛症得到舒緩，有五種唔同療癒模式。

   

小編點評：身體痛症真係好唔舒服，雖然好多人話有用，但買之前最好可以試吓係咪有用先買啦。

  

第九位：寵物攝影機及零食投餵器

平時外出或外遊，寵物留喺屋企會令主人(奴才)心掛掛，一般都會安裝鏡頭睇住佢地，呢個機唔止可以睇，仲可以透過智能電話投放零食俾佢地；另一個重點功能係相互語音交流，同埋可以傳聲音及動態提示(motion alerts)

 

小編點評：有人用呢個機嚟俾獸醫幫寵物睇病，科技幫到我地嘅生活去到新境界。

  

 

第八位：智能鎖

August Wi-Fi Smart Lock 同一般電子鎖唔同係，你唔需要按密碼，只要你拎住個device 係可以連到藍芽或NFC，就可以自動開鎖，非常方便！

 

小編點評：對成日唔記得密碼嘅人好有用！

 

 

第七位：Pitcher PureVis 過濾水壺

Pitcher PureVis 過濾水壺可以喺20秒就淨化水質、清除各種污染物、及99.8%大腸桿菌，保障食水安全，更可以喺APP度睇返水質報告。

 

小編點評: 配合App睇返水質報告非常好，可以監測到每日飲入口嘅水質係點，健康更有保障

第六位：實體轉電子筆記

Moleskine Smart Writing Set 2.0 有一本Moleskine 實體筆記簿以及一支電子筆，支筆有墨水，亦有電子感應器，會記錄咗你嘅動態從而將你寫底嘅記錄變成電子筆記，佢仲會連結去到iCloud等雲端添。

 

小編點評：非常適合喜歡手寫筆記嘅朋友，比起做完筆記影相upload 上cloud 真係方便太多

 

 

 

 

 第五位：摺疊式電腦

摺疊式螢幕嘅Gadgets 開始流入用家市場，但係電腦(Laptops)暫時仲喺起步階段，而台灣ASUS正式製作成功！

 

小編點評：出去開會見客，除咗型之外，仲好方便做presentation！

 

 

 

第四位：Kindle Scribe

Kindle Scribe唔止有一般電子書功能，更可以寫! 10.2-inch 背光螢幕，再連接Amazon 電子書庫，各位喜歡眉批或喺書上做筆記嘅朋友，呢樣產品你好難唔入手!

 

小編點評：簡直打入書蟲嘅心!

 

 

 

第三位：投影機

Samsumg 出咗新款projector，可以做到180 ° 投影角度，仲有自動梯形修正、自動對焦、自動水平調功能，更重要係佢個方便程度，可以用USB電線連外置叉電，用到2小時，好啱戶外投影! 而且佢輕便小巧，可以安喺好多地方添。

 

小編點評：將佢安喺天花盞燈度，射落餐枱就可以自製虛擬桌布，開party 就最啱!

第二位：YSL AI智能唇彩調色機

YSL同L'oreal集團Perso移動應用程式攜手推出ROUGE SUR MESURE智能唇彩調色機，用家能夠隨意調配出Velvet Cream Matte Finish嘅專屬色調，仲可以混搭出多達千種色調，滿足唔同用家嘅喜好，以及唔同場合嘅需要，以後可以自製出最啱自己呢一刻嘅唇色啦！

 

小編點評: 平時喜歡化妝嘅人都會喜歡自家調色，但係因為係人手調所以調出嚟次次都唔同，而呢支係電子調配，分量次次都一樣，可以記低自己獨特配方並重覆使用。

 

 

第一位：Ronin 4D by DJI

Ronin 4D 係一組全方位攝影組合，可以拍攝60 fps嘅6K原片，或120fps嘅4K影片。而且，拍攝時雲台非常穩定，因為加入咗第四軸，能有效消除豎直及其他方向嘅抖動，喺跑步、上下樓梯、近距離平移、狹窄空間運鏡、車拍等複雜場景下，拍攝到穩定流暢嘅畫面。

 

另外，Ronin 4D 首創手自一體跟焦方案，既能自動跟焦，亦能夠手動介入調整焦點位置。傳統攝錄機喺物體運動較快、主體紋理不清或畫面昏暗嘅情況下往往唔能夠準確追焦，但係 Ronin 4D 嘅自動跟焦模式，使用LiDAR 測距器，以每秒20次的頻率檢測物體運動，即使被攝物喺暗光環境或有較大運動模糊時，亦能夠驅動雲台跟隨，保持焦點始終跟隨主體。

 

小編點評：畫面流暢度一流，而手動同自動對焦交互使，令到畫面可以創作出新奇，又或者好似眼睛咁不停改動焦距，令到睇片嘅人有如親歷其境。

【租盤推介】立即搜尋最新租盤

Tech實你 最無聊 最想要 禮物 年尾盤點