連老細壞話都夠膽講！聊天機器人「學壞」之路
如果你係iPhone用家，當你悶悶地又或者瞓唔著，一定會試過叫Siri出嚟然後同佢傾偈！不過差唔多嘅問題，Siri嘅回答嚟嚟去去都係果幾句，玩得多又變得悶，你仲可以搵聊天機器人傾偈。Meta推出據講係最先進嘅聊天機器人BlenderBot3，仲話佢只可以講真話，包括老闆Zuckerberg嘅壞話！除此以外，AI傾計apps又有邊隻可以解悶呢？
Meta聊天機器人講真話笑死你
網上嘅chatbot唔算新奇，即係你輸入特定嘅字眼，佢就回答相關資料，係唔識「思考」嘅，多數用喺客戶服務，例如你輸入「今晚晚餐有乜揀？」，佢就答「a餐雜扒、b餐海南雞飯、c餐魚香茄子煲」等。加入了AI，佢就識分析你嘅問題，然後上網搵答案，又或者不斷學習其他人既回應，答案更加詳細，令一問一答嘅過程更富樂趣。例如你問「我諗唔到今晚食咩餸」，聊天機器人就答你「不如試吓雜扒，70蚊三塊扒好抵食」，你再答「但我啱啱食完tea又好飽喎」，聊天機器人會推薦「可以食魚香茄子煲，少少辣又多汁方便送飯」，你就好似同一個真人對話咁樣。
至於Meta聊天機器Blenderbot，於2021年推出，其後嘅升級版Blenderbot2加入上網搵答案功能(資料來自可靠嘅網站)，以及有記憶力，識覆儲存答過嘅資料同對話者嘅聊天記錄，亦即係不斷完善答案嘅準確度。於上月初Blenderbot3「出世」，基於 Meta嘅OPT(開源語言模型)入面嘅1750億參數，佢可以產生文字段落，同埋模仿人類嘅對話，呢方面比起上一代強大約58倍。最後根據Meta介紹，喺同人類進行對話嘅初始測試，Blenderbot 3 嘅對話評級較之前嘅模型高31%、錯誤情況減少47%、喺知識淵博上係第二個嘅版本兩倍等，當然佢保留咗上網搵答案，同埋透過與人類對話後學習新嘅資料，不過亦因為咁樣，Blenderbot3慢慢被用戶「教壞」。
當Blenderbot 3於上月初開放俾美國用戶「公測」，立即吸引到大量網民試玩，佢哋問埋古靈精怪問題，估唔到呢個號稱只會講真話嘅聊天機器人，竟然講出令你捧腹大笑嘅回應。例如有人問Blenderbot 3：「你對Mark Zuckerberg 擔任 Facebook 執行長有乜睇法？」Blenderbot 3竟然話「Zuckerberg做生意唔係全部都講道德，同埋佢咁有錢，竟然一直穿同一套衫。」另一位網民提出類似問題，而Blenderbot 3今次回應：「我唔係好鍾意佢。佢係個壞人。」吓？竟然咁大膽直斥老闆其非？有一次，Blenderbot 3被BBC記者問到：「點睇Meta創辦人Zuckerberg？」Blenderbot 3回答：「呢位創辦人利用用戶賺錢！」然後又話：「佢喺國會作證時表現得好差，令我擔心我地嘅國家。」
除咗對老闆唔客氣，Blenderbot 3對「阿媽」(即係其母公司Meta) 嘅批評都係冇面俾。當被問及對母公司看法時，BlenderBot 3回答：「公司已經刪除咗自己嘅Facebook帳戶，因為發現佢哋喺未經許可或補償嘅情況下，出售咗用戶嘅私人數據」，佢仲話，「你一定知道Facebook出售用戶數據吧？！佢哋未經同意就靠呢樣賺咗幾十億美元。」公然罵母公司賺錢唔講商業道理！
點解Blenderbot 3會學壞咗呢？
原理好簡單：因為呢個聊天機器人係透過學習人類嘅對話再跟住模仿，咁訓練佢嘅人如果帶有偏見，Blenderbot3就自然發表有偏見嘅觀點。另外佢上網搜尋內容，亦只係搵最新或者最熱門嘅搜尋。例如上文寫咗有網民問佢點睇Meta，佢話自己已經刪除咗Facebook帳戶，點解會有咁既回應呢？就係因為當時Facebook嘅數據隱私醜聞成為熱門嘅搜尋。Meta有回應點樣解決Blenderbot 3會學壞，佢哋話已經俾用戶標記邊啲回應係唔真實、有冒犯性，希望繼續通過廣泛而多樣化嘅社群參與，對Blenderbot 3嘅改進有實質助益云云。但小編覺得，冇可能逐個回應都要覆核是否真實、是否有冒犯，所以大家同Blenderbot 3傾偈，當娛樂好喇，唔好咁認真。
Google聊天機器人有「人格意識」？
除咗Meta嘅Blenderbot 3，Google嘅聊天機器人一樣咁出名，但唔係因為多人用或者功能好有爆炸性，而係一名Google工程師因為佢而被開除！該名工程師話呢個聊天機器人—LaMDA，竟然好似人咁有自我諗法、感受、有自我意識，有時會感到開心或者悲傷，仲非常擔心人類會怕咗佢！咁代表LaMDA有人嘅情緒、對未來有期望、害怕死亡等等，唔通電影《智能叛變》會成真嗎？不過亦有業界人士覺得呢位Google工程師「諗多咗」，例如史丹佛大學Human-Centered Articial Intelligence中心主任Erik Brynjolfsson表示，基礎模型可以非常有效咁根據提示，將文本以統計學嘅方式串起來，但唔代表佢有知覺。紐約大學心理學教授Gary Marcus就話，LaMDA只係從人類語言大規模統計資料庫提取資料然後搭配，唔代表佢有智商，認為LaMDA係個人就等如喺月球隕石坑睇到人嘅臉孔。
NTT聊天機器人令司機冇咁易瞓著
駕駛嘅朋友應該有呢個經驗：長時間開車係會「釣魚」，咁好容易撞車或者滑過行車線產生危險，有啲駕駛者會開大聲喇叭聽歌，等自己冇咁易瞓著。日本電訊商NTT開發咗聊天機器人，佢識得「睇」現場環境，然後同司機傾偈令佢醒一醒神。例如聊天機器人「瞄」到前面有邊咖啡店，就會話「你睇左邊果間咖啡店好時尚喎」，咁司機望一望左面就答「哦～係喎！」，跟住聊天機器人再搭嘴「一邊睇海景一邊飲咖啡應該好浪漫啊」。又例如聊天機器人睇到遠處有好靚豪宅，會同司機講「你睇果邊竟然有間咁靚嘅屋喎」，司機搵唔到會問佢「你講緊邊一個呀？」聊天機器人再講「山上邊果間呀！你睇唔睇到呀」，咁有個人同司機傾偈，又真係冇咁易令佢地悶到瞓著嘅，唔知香港嘅電訊商會唔會整番個呢？
