家長必睇「黑技術」 兩招防小朋友「中毒、上癮」
而家嘅學校慢慢開始轉化為電子模式教育，有電子產品幫助的確可以讓學習變得更加生動有趣，亦都提升小朋友學習嘅能力同埋社交能力，不過家長最驚係小朋友會濫用科技產品，甚至喺網上面下載到一啲唔適合佢哋睇嘅內容同埋軟件，「中毒」或「上癮」就弊！趁就嚟開學，一齊嚟睇吓到底應該要點樣幫小朋友選擇適合佢哋嘅Tablet（平板電腦）同手機啦！
家長應如何幫小朋友選擇電子產品？
既然小朋友喺學習或者生活上都冇辦法避免使用電子產品，咁就要選擇最好同埋最適合嘅產品比佢哋使用，以下三點係選擇呢啲電子產品俾小朋友嘅時候必須考慮嘅事項。
(i)功能方面
市面上嘅平板電腦同埋手機喺功能上面差異可以非常大，所以選擇電子產品嘅功能係同用途直接掛鉤嘅。有好多電子產品例如iPad同埋iPhone，佢哋都會有出普通版同埋專業版，以呢兩個型號為例，如果小朋友只係用嚟讀書或者做一啲文書處理嘅用途，就未必需要買到最專業嘅版本；不過有啲牌子可能最普通嘅版本都未必有咁完善或者咁穩定嘅文書系統，呢個時候就要靠家長去留意一吓小朋友平時使用電子產品嘅用途而作出選擇，家長亦都要衡量自己嘅經濟狀況而去選購。
(ii)熒幕大小
平板電腦或者手機都有唔同大細，其實大熒幕同小熒幕係取決於使用習慣，唔一定熒幕大比較護眼，家長要留意嘅係呢部平板電腦或者手機嘅屏幕有冇加入一啲護眼功能，例如防藍光等。至於屏幕嘅大細的確係可以影響使用嘅方便程度，如果呢部電子產品唔需要經常帶出街嘅話，可以買個比較大嘅尺寸，咁樣可以方便小朋友去操作同埋觀看。
(iii)系統和內存設備
相信家長都希望買部「襟用」嗰電子產品比小朋友，唔需要成日換，呢個時候就好需要睇呢部電子產品嘅內部設備，包括內存、芯片、續航力等等。
內存嘅話建議家長可以買多少少空間，小朋友喺學習上面好多時都要下載影片或者圖片，如果空間太少好可能下載咗一兩個Apps或者一兩條片就已經冇晒位，咁樣對於小朋友來講非常唔方便。
至於芯片等內部設備，未必每一位家長都識得去判斷邊塊芯片比較好，呢個時候可以揀番一啲比較出名同埋多人買嘅大牌子，質量就會有保證。
續航力方面係判斷呢部平板電腦或者手機會唔會好快冇電，如果小朋友要經常帶出街嘅話，就建議買一部續航力長啲嘅電子產品，咁你就唔使經常要叉電，而且續航力對於一部電子產品嘅壽命亦都有直接關係。
電子產品除咗有教學用途之外，亦同時包含咗非教學元素，當家長決定要俾小朋友用電子產品嘅時候，就要識得權衡利弊，因為電子產品最主要嘅影響係會導致小朋友濫用或不當實用電子產品，又或者導致近視加深等問題。加上而家網絡嘅資訊非常之多，家長要好好控制小朋友使用電子產品嘅頻率，同埋要盡量留意小朋友用電子產品嘅情況。
1. 電子產品內的控制模式
有啲電子產品例如iOS系統的iPhone和iPad都有控制模式可以通過一啲設定去控制小朋友嘅使用時間。
設定方法：
「設定」>「熒幕使用時間」>「停用時間」
然後就可以選擇某啲程式喺你設定咗嘅時間內先可以使用，如果過咗嗰個時間就需要家長輸入密碼。
1. 合法的家長監控App
如果電子產品冇操控功能嘅話，家長可以試吓download一啲合法嘅家長監控Apps，例如OurPact、Kroha等等，呢啲Apps宗旨都係想保護小朋友等佢哋唔好上到一啲唔好嘅網站同埋進行對小朋友用電子產品嘅時間管理，呢啲apps大多數都有限制使用、網站監控、設置使用時間、鎖屏時間等等嘅功能，甚至有啲可以睇到小朋友社交軟件嘅使用情況同對話，你更了解小朋友使用電子產品嘅情況，以保護小朋友同埋阻止不當嘅內容。
不過家長要留意嘅係，呢啲監控功能好容易造成對小朋友嘅私隱問題，家長應該係監控嘅同時保留小朋友使用電子產品嘅空間。市面上亦都仲有好多種免費同收費嘅選擇，大家可以去參考對比，再因應自己需要去選擇。
