每位爸爸內心都住咗個小男孩 送俾「科技控」爸爸嘅7大 Hi-Tech 禮物

1.充電打氣泵

如果你嘅爸爸有揸車，可以考慮小米呢個充電打氣泵，佢係一個尿袋但同時又係電動打氣泵，佢設計得非常之細小，只有480克，放入袋拎出街都好方便，就算放喺屋企都唔怕阻地方。呢個電動打氣泵仲有五種模式，符合唔同人嘅需要，幫單車碌、足球充氣都得。就算無揸車嘅爸爸，都一定會對佢有興趣。

 

好多評論都話呢個打氣泵好方便，不過就係嘈咗少少同埋電池容量唔大，叉一兩隻呔就會無曬電，不過對於一啲緊急情況嚟講，例如:車呔碌到釘漏氣，可以緊急充番氣然後去補呔，所以送俾爸爸放喺車尾箱以防萬一都係個唔錯嘅選擇！

2.迷你復古街機遊戲機

有一條問題，女人成日都會問：「點解男人咁鍾意打機？」原因好簡單，因為每個男人心入面都住咗一個男孩，即使佢已經成為人哋爸爸，鍾意打機嘅情懷都唔會消失。講到打機，呢款迷你復古街機遊戲機絕對係爸爸們嘅童年回億，望住佢就好似返返去細個嗰陣同朋友一齊玩街機咁。唔好以為呢部嘢細細部咁只係擺設，佢其實真係一部可以玩嘅迷你遊戲機，入面仲有成300款懷舊小遊戲，例如射12碼、賽車、炸潛艇等等，當爸爸返工辛苦咗一日，放工可以玩吓呢啲小遊戲，一定好滿足。

 

如果喺平時買呢個遊戲機，一定會被媽媽話嘥錢，所以大家作為仔女喺父親節送俾爸爸就啱哂喇！仲可以光明正大拎出嚟玩～

3.星球大戰藍牙音響

男人買嘢嘅思維同女人有啲唔同，好多時都唔係在乎價錢或者實用性，而係在乎嗰樣嘢型唔型。好似呢個星球大戰藍牙音響咁，佢嘅外表夠Cool夠型就不在話下，仲採用1比1還原頭像大小製作，角色嘅款式好多，結合雷雕工藝，成個藝術品咁。喺咁正嘅外表之下，其實佢係一個藍牙音響，配備2.1聲道喇叭，有2個3W中高音喇叭同1個15Ｗ重低音喇叭，送俾「星戰迷」嘅爸爸，佢可能會感動到喊。

 

呢個看似唔實用嘅嘢其實對於男人嚟講有另一層價值，試諗吓每當有朋友嚟你屋企拜訪嘅時候，見到呢個星球大戰藍牙音響放喺廳，成件事係幾咁震撼幾咁有型，作為「父親」亦都顯得特別有面子。

4.即影即有相機

智能手機盛行，老婆係唔明熱愛攝影嘅老公點解仲掛部又重又大嘅單反相機去旅行，更加唔明影出嚟一啲都唔Sharp嘅即影即有相機仲有乜作用？不過，男人嘅情懷係好多老婆都唔明㗎。

如果你嘅爸爸都有呢種情懷，不仿考慮買部最新款嘅即影即有相機送俾佢。俾爸爸知道原來仔女係有用心留意爸爸嘅喜好，二嚟俾爸爸親手為大家留低美好嘅回億，爸爸會覺得呢啲就係家庭幸福。

 

Polaroid 寶麗來出嘅新款即影即有相機，佢有5個新嘅鏡頭濾鏡，更有光繪、雙重曝光、手動模式等，變得好「Hi-Tech」，可以俾爸爸過吓玩專業相機嘅手癮，係一個唔錯嘅父親節禮物選擇。

5. 鵝頸電水壺

有唔少人嘅爸爸都鍾意飲茶，飲茶既健康亦養生，鍾意飲茶嘅人除咗鍾意茶本身嘅味道之外，更加享受嘅係沖泡過程，呢個時候電水壺就非常有用啦。唔好睇呢款鵝頸電水壺只係一個好普通嘅電水壺，佢有一個好過癮嘅精密出水設計，就係將出水位設計到好似鵝頸咁，當倒水時，水流嘅控制可以達到最佳嘅倒入流量，而且仲可以平衡把手，提供更堅固嘅抓握，等水慢慢倒出，沖水嘅人亦可以一路欣賞水流嘅美感，享受極致嘅沖泡體驗。

 

市面上一個電熱水壼都係兩三百，唔少精打細算嘅媽媽都唔明點解要買個貴啲嘅水壺，所以好多時爸爸雖然心入面係鍾意，但都唔敢買呢啲得意嘅產品，我哋一於趁父親節送俾爸爸氹佢開心啦！

6.Tile Sticker藍牙防丟器

隨住年齡增長，有啲爸爸嘅記性可能會冇以前咁好，佢地會成日唔記得啲嘢放喺邊，呢個時候不如試吓用Tile Sticker藍牙防丟器，佢可以貼喺任何物件上，例如搖控器、相機等一啲成日都會唔記得放喺邊嘅物件，佢係防水設計而且超級迷你，如果個物件同佢相同顏色嘅話真係唔太覺佢嘅存在。Tile Sticker用法亦都相當簡單，貼上之後只要開啟Tile 應用程序就可以連接物件，當你要搵物件嘅時候，可以透過APP控制令佢發出聲響，咁就好易搵返物件出嚟啦！Tile Sticker藍牙防丟器係一樣又實用又有趣嘅禮物，爸爸收到一定會覺得好窩心。

7.The Smart Garden 3智能盆栽

唔知你哋爸爸平時喺屋企有冇種植嘅習慣？種植除咗可以解悶，仲可以令人變得開朗，因為當見到你一手一腳打理嘅農作物生得好靚嗰陣，會有好大滿足感。The Smart Garden 3智能盆栽就好似一個室內嘅花園咁，可以喺入面種植唔同種類嘅植物、水果同埋蔬菜，佢嘅特點係就算唔太識種植嘅人都好易上手。呢個新科技整合智能 LED 照明系統，以及監測植物生長嘅監測系統，基本上唔洗點理佢都可以成功種到植物。

 

如果你爸爸係鍾意種嘢嘅「農夫爸爸」，用咗呢個產品之後就可以不停享受睇住植物健康成長嘅滿足感，假如同時媽媽都鍾意種植，咁就更啱喇，佢哋閒時可以兩公婆一齊種吓嘢，增進夫妻之間嘅感情。

禮物 Tech實你 科技 父親節