最「嗱喳」日用品 含菌量多過廁所板點消毒至好？

細菌滋生原因

手機螢幕滋生細菌嘅成因有好多，除咗喺平時空氣中會有細菌之外，我哋成日都會將手機放枱面，邊食飯邊用手機等，呢啲行為都會令手機滋生大量細菌，加上手機的溫度一般都係攝氏25-32℃，係細菌繁殖嘅最佳溫度。

 

而最大嘅原因就係普遍都市人習慣去廁所嗰陣用手機，廁所每個角落充滿細菌，亦係一個非常適合細菌生存嘅環境。加上我哋雙手好容易會粘到唔同嘅細菌，所以當帶住手機入廁所用嘅時候，手上、廁所嘅細菌就會粘附喺手機表面，令手機滿佈細菌。

 

手機表面嘅細菌大部分都係大腸桿菌、金黃色葡萄球菌等細菌同埋流感病毒，有研究發現手機螢幕含菌量比馬桶座墊高3.5倍，而裝上保護殼嘅手機含菌量就更加高，因為當手機裝上保護殼，手機同殼之間嘅縫隙就會增多，咁樣就更加藏污納垢。

研究報告

 

有傳媒分別由50部智能手機、手機外殼同埋馬桶座表面採取樣本進行對比檢驗，結果發現廁所板有220單位嘅細菌，手機膠殼平均有1,479單位，後者比前者高出近6倍。另外，手機使用皮套嘅情況就更嚴重，其污糟程度係廁所板嘅17倍。

 

此外，該報告亦同時抽樣2000人進行調查，有4成受訪者承認會喺廁所內用手機，不過得2成人話用完之後會清潔手機。專家警告，手機會變得咁污糟，好大原因就係因為用家將手機帶入廁所所致。

消毒手機小技巧

 

1.唔好直接噴酒精

 

清潔劑同埋酒精雖然可以有效消毒手機，但千其唔好將清潔劑同埋酒精直接倒落或者噴落手機表面，特別係高濃度嘅清潔產品，因為清潔液可能會流入機身，導致手機損毀。正確嘅方法應該要先將清潔產品滴喺抹手機螢幕專用嘅布上，如果冇嘅話，眼鏡布或一啲更軟身嘅布都可以代替，要注意嘅係，清潔產品份量唔可以過多。

 

2.棉花棒抹縫隙

手機保護殼、SIM卡插槽、3.5mm耳機孔同埋充電位等細小嘅罅隙位置除咗容易積聚細菌同塵埃之外，都係細菌躲藏嘅好地方，大家喺消毒手機嘅時候，可以用棉花棒沾少少手機清潔劑，清理細小縫隙嘅塵埃。要留意清潔SIM卡插槽、3.5mm耳機孔同埋充電位呢啲位置盡量唔好用純酒精，以免傷害手機內部。

3.避免過度擦拭

消毒手機唔係抹得愈多次愈乾淨，喺消毒手機嘅時候千其唔好過度擦拭，將濕咗酒精嘅布喺手機表面擦拭幾次，見到冇乜灰塵同油脂就可以，過度嘅擦拭可能會損害手機螢幕。

疫情 手機 消毒