三個運動遊戲 「豆腐膶」屋企都可爆放電
第五波疫情嚴峻，中、小學同幼稚園提前喺三至四月放暑假，呢個突如其來嘅暑假令家長們措手不及，之前一直上網課仔女總算係有寄託，而家停課加上留喺屋企防疫如同困獸鬥。面對仔女有用唔完嘅電力，仲冇得出街跑吓跳吓放電嘅現況下，對父母，尤其係要喺屋企工作嘅爸媽嚟講真係一個大考驗。家長們而家有救啦！小編即刻介紹三款喺屋企消耗仔女電力嘅放電運動遊戲 APPS ，好玩又夠攰，迅速幫你嘅小朋友電力歸零！
1. Active Arcade
Active Arcade 係一款支援 iPhone 、 iPad 嘅應用程式，喺「健康與健身」分類長排高踞榜首，佢係一款完全免費嘅主題式互動遊戲，主題式嘅互動遊戲，操作簡單好適合細路仔玩，只要企喺螢幕前面，根據指示去做動作就可以得分。裡面一共有 19 款運動遊戲，一場遊戲只需一分鐘，仲會紀錄消耗嘅卡路里同運動嘅時間，無論係大人想做運動、細路仔想放電都好適合。另外仲有拼字遊戲，可以練習一下英文。可惜，目前 Active Arcade 未支援 Android 版本。
2. Plaicise
Android 用戶無法下載 Active Arcade ，但可考慮另一款 Plaicise ，佢嘅概念同 Active Arcade 好相似，都係透過 AI 感應嘅主題式互動遊戲，一樣根據畫面指示，完成動作就能達成關卡目標。內建有 10 多種遊戲模式，主要區分為全身有氧運動、上半身同下半身三個分類，每個分類又有多種唔同嘅玩法可以選擇，練習模式有單人模式，亦都可以同時同屋企人、朋友一齊線上運動，增添遊戲體驗。
3. Jumpr-Virtual Jump Rope
呢款由台灣團隊開發、結合虛擬跳繩嘅 Jumpr-Virtual Jump Rope ，App 唔需要任何裝備，只要企喺手機前面，畀前鏡頭影到自己嘅全身影像，畫面裡面就會出現一條虛擬繩子，呢個時候幻想攞起條繩就可以開始跳躍，就好似真係跳繩一樣。每次運動時，遊戲仲會統計埋玩家跳繩嘅次數、速度同燃燒熱量，所有嘅運動紀錄都會儲存低，仲可以趁呢個機會畀仔女抓緊長高黃金期。
3 款運動遊戲App比較： (5★為高)
放電運動有幾重要：
防疫在家，大家都好困擾，香港寸金尺土，屋企地方較細，能夠活動嘅地方有限。家長喺疫情期間，可規劃一下仔女作息時間嘅安排，運動可採用定點式，唔使大空間跑動嘅活動，用一啲互動式遊戲嚟伸展筋骨，對身體有益之餘，亦可以消耗一定體力，對於仔女夜晚睡眠都有幫助。同時，運動消耗熱量，小朋友飲食方面都會變得正常，唔會肥，適量嘅筋骨活動對血液循環都有好處。
